Прызёр Гульняў у Пекіне Антон Смольскі пракаментаваў стварэнне тэлеграм-канала, які вядзе сумесна з алімпійскай чэмпіёнкай у эстафеце, сваёй жонкай Дынарай (экс-Алімбекава), паведамляе Bet News.
«Шмат каму ён [канал] цікавы. Спачатку быў больш супраць, чым за. У мяне не надта шмат вольнага часу, каб марнаваць яго на сацсетку. У Дынары часцей атрымліваецца знайсці вольную хвіліну, і яна паспявае расказаць і паказаць на фота і відэа нашыя трэніроўкі і часткова сямейнае жыццё», — сказаў Смольскі.
«Сям'я, спорт, нашае жыццё», — гаворыцца ў апісанні канала пад назвай «СмольSKIе». Ён быў запушчаны 1 жніўня. За месяц у яго менш чым 1000 падпісчыкаў — 923 на момант напісання гэтай навіны. Акрамя трэніровачных будняў і вынікаў спаборніцтваў муж і жонка выкладваюць шмат фота з сынам Сафронам.
Для параўнання: у інстаграм-акаўнце Дынары — 30 000 падпісчыкаў, у Антона — 12,1 тысячы. У Ганны Солы, галоўнай суперніцы Смольскай, — 16,8 тысячы.
